മകനെക്കാള് കൂടുതല് മാര്ക്ക് വാങ്ങി; എട്ടാം ക്ലാസുകാരനെ സഹപാഠിയുടെ അമ്മ കൊലപ്പെടുത്തി
പുതുശ്ശേരി: പഠനത്തില് മികവു പുലര്ത്തിയതില് അസൂയപൂണ്ട് എട്ടാം ക്ലാസുകാരനെ സഹപാഠിയുടെ അമ്മ കൊലപ്പെടുത്തി. പുതുച്ചേരിയുടെ ഭാഗമായ കാരയ്ക്കലിലാണു ക്രൂരമായ സംഭവം. കാരയ്ക്കല് നെഹ്റു നഗറിലെ സ്വകാര്യ സ്കൂളിലെ എട്ടാം ക്ലാസ് വിദ്യാര്ഥി ബാലമണികണ്ഠനാണ് മരിച്ചത്. ജൂസ് പാക്കറ്റില് വിഷം ചേര്ത്തശേഷം കുട്ടിക്കു നല്കുകയായിരുന്നു.
അതേസമയം കുഞ്ഞിന് മതിയായ ചികിത്സ ലഭിച്ചില്ലെന്ന് ആരോപിച്ച് നാട്ടുകാര് ആശുപത്രി ആക്രമിച്ചു. എങ്ങനെയെങ്കിലും തന്റെ മകനെ ക്ലാസില് ഒന്നാം സ്ഥാനത്ത് എത്തിക്കാന് ഒരമ്മ ചെയ്ത കൊടുംക്രൂരതയില് നടുങ്ങിയിരിക്കുകയാണ് കാരയ്ക്കല്. ബാലമണികണ്ഠന് ഇന്നലെ ക്ലാസ് കഴിഞ്ഞു വീട്ടിലെത്തിയതിനു പിന്നാലെ ഛര്ദിച്ച് കുഴഞ്ഞുവീണു. ആശുപത്രിയില് എത്തിച്ചപ്പോള്, വിഷം അകത്തുചെന്നുവെന്ന് ഡോക്ടര്മാര് സംശയം പ്രകടിപ്പിച്ചു. തുടര്ന്ന് മാതാപിതാക്കള് ചോദിച്ചപ്പോഴാണ് സ്കൂളിലെ സുരക്ഷാ ജീവനക്കാരന് ജൂസ് നല്കിയിരുന്നതായി കുട്ടി വെളിപ്പെടുത്തിയത്.
Crime Related News
